UZB sport yangiliklari

[eSYs]

Таиланддаги “Қирол Кубоги” доирасидаги Кореяга қарши учрашувдаги можаро сабаб Ўзбекистон Футбол Федерацияси Шуҳрат Мақсудовни Ўзбекистон олимпия терма жамоаси бош мураббийлиги вазифасидан озод этди.

Терма жамоанинг янги бош мураббийи маълум муддат ичида тайинланади.

2015 йилнинг 31 январида Корея терма жамоасига қарши ўйинда спортчига хос бўлмаган ҳатти-ҳаракатлари билан рақиб ўйинчисига қўл кўтаргани ва бу иши билан мамлакат шаънига доғ тушишига сабабчи бўлганлиги учун Тоҳир Шамсиддинов ЎФФ “Тартиб-интизом кодекси”нинг тегишли бандларига асосан Ўзбекистон олимпия терма жамоаси сафидан ўчирилди ва бир йил муддатга ҳар қандай кўринишдаги футбол фаолиятидан четлатилди.

Ўзбекистон терма жамоалар маркази директори Асқар Толибжонов ва техник директор Рустам Акрамовга футболчиларни мазкур мусобақага маънан, руҳан ва жисмонан етарли даражада тайёрлай олмаганлиги, терма жамоада интизомни маҳкам тутмаганлиги, шунингдек, халқаро ОАВнинг танқидий чиқишларига сабабчи бўлганликлари учун қаттиқ огоҳлантириш олдилар.

Ўзбекистон Профессионал Футбол Лигасига барча футбол клубларининг раҳбарияти вакиллари билан учрашиб, уларга футболчиларни маънавий-маърифий, руҳий ва жисмоний тайёрлаш ишларида таълим-тарбия масалаларига алоҳида эътибор қаратиш бирламчи вазифа эканлигини маълумот сифатида етказиш вазифаси юкланди.

Ўзбекистон Футбол Федерацияси ушбу масала юзасидан бошқа изоҳ бермайди.

[eSYs]

Россиянинг Подольск шаҳрида юнон-рум кураши бўйича ўтказилган халқаро турнирда полвонларимиз 1 кумуш, 5 бронза медални қўлга киритди.

Турнирда икки юз нафардан зиёд спортчи ғолиблик учун куч синашди.

Мусобақада ҳамюртимиз Нурбек Ҳошимбеков вазни 75 килограммгача бўлган полвонлар беллашувида кумуш медаль билан тақдирланган бўлса, ўз вазн тоифасида Элмурат Тасмурадов, Данила Морозов, Жонибек Отабеков, Дилшод Ҳакимов, Мўмин Абдуллаев учинчи ўринни эгаллади.

[eSYs]

Ўтган мавсум чемпионатимизни бешинчи ўринда якунлаган Муборакнинг “Машъал” клуби келаётган мавсумда ўз олдига янада улкан вазифаларни қўйган.

“Газчилар” 2015 йилги мавсумда олий лигада кучли учликка киришни мақсад қилишаётган экан. Бу ҳақда “Машъал”нинг етакчи ўйинчиларидан бири Шаҳзод Шаймонов маълум қилди.

“Машъал” Ўзбекистонда ўз довруғига эга клуб саналади. Жамоамиз доимо яхши ўйин намойиш қилиб, ўз мухлисларини хурсанд этишга уриниб келади. Ўтган мавсум қайсидир маънода ўз олдимизга қўйилган вазифани уддаладик. Қайд этилган натижадан ҳаммамизнинг кўнглимиз тўлди.

Янги келаётган мавсумда ҳам мақсадларимиз улкан. Биз ҳар бир учрашувда муҳим очколарни қўлга киритиб, чемпионат сўнггида кучли учликка киришни кўзлаяпмиз. Ўйлашимча, ушбу вазифани уддалай оламиз.

Тўғри, жамоамизни баъзи бир етакчилар тарк этишди. Аммо таркибда қолган ва янги қўшилган футболчиларда иштиёқ юқори. Ўзим ҳам 2015 йилги миллий чемпионатимизда яхши ўйин кўрсатишни мақсад қиляпман. Ҳозир янги позицияда ўйнай бошладим. Энди ҳимоячи сифатида тўп сураман. Умид қиламанки, мураббийларимиз менга билдирган ишончни оқлайман”, - дейди тажрибали футболчи.

Янги мавсумга тайёргарликнинг энг муҳим палласига киришган муборакликлар сафига қишда бир қатор янги футболчилар келиб қўшилишди. Мураббийлар штаби айни пайтда жамоанинг ўйин услубини шакллантириш борасида иш олиб боришмоқда. “Машъал” ҳозир ПФЛ кубогида иштирок этмоқда.

Тажрибали мутахассис Александр Хомяков шогирдлари ўз олдиларига қўйилган вазифани уддалай олишармикан?! Бунисини энди янги мавсум бошлангач билиб оламиз…

[eSYs]

“Бунёдкор”нинг ОЧЛ-2015 “плей-офф” босқичи доирасидаги рақиби “Ал-Жазира” жамоаси ушбу турни меҳмонда “Эмирейтс” клубига қарши ўтказиб, сафардан 2:0 ҳисобидаги ғалаба билан қайтди. Али Мабхут 18-дақиқада ҳисобни очган бўлса, орадан уч дақиқа ўтар-ўтмас “Эмирейтс” ҳимоячиси Муборак Саид кутилмаганда ўз дарвозасини ишғол қилиб, автогол муаллифига айланди.

12 февраль
БАА чемпионати, 16-тур
“ЭМИРЕЙТС” – “АЛ-ЖАЗИРА” 0:2 (0:2)
Голлар: Али Мабхут 18 (0:1), Муборак Саид 21 автогол (0:2)
“Ал-Жазира”: 36.Ҳолид Ал-Сенани, 60.Башир Саид, 23.Ҳолид Сабел, 28.Халфан Саид, 18.Абдулла Муса, 8.Жусилей, 10.Ланзини (82.Султон Ал-Сувайди 84), 13.Ҳамис Исмоил (4.Ёсир Матар 81), 9.Вучинич, 11.Питроипа, 7.Али Аҳмад Мабхут (70.Аҳмад Ал-Аттас 90+2)

Ушбу учрашув Эрик Геретс бошчилигидаги “Ал-Жазира” клубининг Тошкент сафари олдидан ўтказган сўнгги расмий баҳси эди.

[eSYs]

Тошкентнинг “Бунёдкор” жамоаси кеча Бекободнинг “Металлург” клуби билан назорат учрашувида куч синашди.

Бекободликларга қарши баҳс 17 февраль куни “Ал-Жазира” билан бўладиган учрашувдан олдинги “репетиция” вазифасини ўтаб берди.

Учрашув “Бунёдкор” стадионида бўлиб ўтди. Қизиқарли кечган баҳсда “қалдирғочлар” 4:0 ҳисобида ғалаба қозондилар. Голларга Сардор Рашидов, Шакер Зуаги (2та) ва Элдор Шомуродов муаллифлик қилишди.

[eSYs]

Англияниннг "Манчестер Юнайтед" клуби раҳбарияти Мадриднинг "Атлетико" жамоаси ҳимоячиси Жоао Миранда учун 27 миллион евро беришга тайёр.

Бу ҳақда Испания нашрлари хабар тарқатган.

Шу билан бирга, Мадрид клуби футболчини мавсум якунига етгандан сўнг сотишни режалаштирган. Унга бошқа клублардан ҳам қизиқишлар бор.

[eSYs]

Англиянинг "Ливерпуль" клуби бош мураббийи Брендан Рожерс Италиянинг "Рома" жамоаси ярим ҳимоячиси Миралем Пьянич борасида музокара ўтказиш учун Римга йўл олган.

Бу ҳақида Европа матбуоти хабар тарқатди.

Пьянич мерсисайдликлар таркибида Стивен Жеррарднинг ўрнини босиши кутилмоқда. Ёзда Жеррард жамоадан кетишини яхши биласиз.

Эслатиб ўтамиз, Пьянич билан шунингдек "Манчестер Юнайтед" клуби ҳам қизиқиш билдирган.

[eSYs]

"Барселона" ярим ҳимоячиси Хави Неймарнинг трансфери борасидаги миш мишлардан ҳамма чарчаганини тан олди.

"Неймар иши" мавзуси бир йилдан ошиқ муддат давомида тинмай кўтариб келинмоқда. Шу сабабли ҳаммамиз бундан чарчадик.

Бу мавзу жуда оғир ва мунтазам кўтарилиб тургани жамоамизга босим юкламоқда. Бу иш тезроқ ёпилишини ҳамма кутяпти", - дейди Хави.

[eSYs]

"Говерла" клуби ҳужумчиси Максим Шацких футболчилик фаолиятини якунлагач, мураббийлик билан шуғулланиш ниятида эканини маълум қилди.

Ўзбекистон терма жамоаси собиқ футболчиси Dynamo сайтида савол-жавоб ўтказадиган саҳифасида келгуси фаолияти борасида берилган саволга шундай жавоб берган.

Эслатиб ўтамиз, Максим Шацких ўз вақтида "Динамо" клуби шарафини ҳимоя қилган. Ўзбекистон терма жамоаси сафида 60 та ўйинда майдонга тушиб, 34 та гол киритган.

[eSYs]

25 февраль куни Қаршидаги “Марказий” ўйингоҳда ОЧЛ-2015 “D” гуруҳи 1-тури доирасидаги “Насаф” – “Тракторсозий” (Эрон) учрашуви бўлиб ўтади.

Осиё футбол конфедерацияси ушбу учрашувга тайинланган ҳакамлар гуруҳини эълон қилган. Унга кўра, “Насаф” – “Тракторсозий” (Эрон) учрашувини Абдуллоҳ Муҳаммад Ал Ҳилолий бошчилигидаги омонлик ҳакамлар гуруҳи бошқариб боради.

Учрашув бош ҳаками – Абдуллоҳ Муҳаммад Ал Ҳилолий 1970 йил 1 сентябрь (44 ёш) куни Омоннниг Наҳал шаҳрида таваллуд топган. Аслида ҳарбий хизматчи ҳисобланади.

Халқаро фаолиятини 2002 йилдан бошлаган Абдуллоҳ Муҳаммад Ал Ҳилолий бунгача Осиё чемпионлар лигасида, 2008 йил Пекинда бўлиб ўтган ёзги Олимпиядада, жаҳон чемпионати саралаш учрашувларида ҳамда Осиё Кубоги баҳсларини бошқарган.

“Насаф” – “Тракторсозий” учрашувига тайинланган омонлик ҳакамлар гуруҳи шу йили Австралияда бўлиб ўтган ОК-2015да ҳам бир қанча ўйинларни бошқарган. Жумладан, Корея Республикаси – Саудия Арабистони 1:4 ва бошқа ўйинлар.

25 февраль 2015 йил

Осиё Чемпионлар лигаси.
“D” гуруҳи 1-тур учрашуви
Қарши шаҳри. “Марказий” стадиони. Соат 18:00

“НАСАФ” (Ўзбекистон) – “ТРАКТОРСОЗИЙ” (Эрон)

Бош ҳакам: Абдуллоҳ Муҳаммад Ал Ҳилолий (Омон)
Қанот ҳаками: Ҳомид Ал Маяҳий
Қанот ҳаками: Абдуллоҳ Ал Жирданий
Заҳира ҳаками: Саид Ёқуб (барчаси – Омон)

Ҳакамлар назоратчиси: Муҳаммад Ал Совил (Саудия Арабистони)

Учрашув комиссари: Донг Женг (Хитой),